Ўзбекистон Республикаси Ички ишлар вазирлигининг 2019 йил 30 сентябрдаги “Ички ишлар вазирлиги Академияси курсант ва тингловчиларининг Ички ишлар органларида амалиётларини ташкил этиш тўғрисида”ги буйруғи, жорий йилнинг 3 февраль кунидаги фармойиши ва Сирдарё вилояти Ички ишлар бошқармаси бошлиғининг 2024 йил 3 февралдаги буйруқларига мувофиқ, жорий йилнинг 5 февраль кунидан 12 май кунига қадар кундузги таълим 3-ўқув курси курсантлари билан битирув малакавий иши олди амалиёти ташкил этилди.

Жорий йилнинг 10 май куни Сирдарё вилояти Ички ишлар бошқармаси Мажлислар залида бошқарма бошлиғининг ўринбосари полковник Қ.Х.Шерматов, Вазирлик ШХББ Сирдарё вилояти бўйича бўлими бошлиғи подполковник Қ.Т.Ўринбаев, ИИВ Академияси Автомобиль тайёргарлик кафедраси ўқитувчиси капитан Ф.Э.Холдоров, бошқарма соҳавий хизматларининг бой амалий тажрибага эга бўлган ходимлари иштирокида амалиёт якуни бўйича имтиҳон тадбирлари ташкил этилди.

Капитан Ф.Э.Холдоров томонидан курсантларга вазирлик буйруғи асосида имтиҳон талаблари батафсил етказилган бўлса, подполковник Қ.Т.Ўринбаев томонидан хизмат ва ижрочилик интизоми, хизмат кийимини кийиб юриш қоидаларига риоя этишлари, спиртли ичимлик истеъмол қилган ҳолда ва тегишли ҳужжатларсиз транспорт воситасини бошқармаслик, шунингдек фуқаролар билан ноўрин муносабатга киришмаслик юзасидан ўзининг кўрсатмаларини бериб ўтди.

Курсантларни ватанпарварлик руҳида тарбиялаш доирасида уларда Ватанга садоқат, касбига нисбатан ғурур ҳиссини шакллантириш мақсадида Сирдарё вилояти Ички ишлар бошқармасида ташкил этилган “Аждодлар изидан авлодлар” музейига ташриф амалга оширилди.

Шунингдек, Гулистон шаҳрида жойлашган Хотира майдонига ташриф буюрган курсантлар, Мотамсаро она ҳайкали пойига гул қўйишиб, тинчлик учун, авлодлар келажаги учун жон фидо қилган юртдошларимиз хотирасига ҳурмат бажо келтиришди. Иккинчи жаҳон урушида фашизм устидан қозонилган ғалабага Ўзбекистон халқининг қўшган ҳиссаси, ўзбекистонликларнинг Иккинчи жаҳон уруши жанг майдонларида кўрсатган қаҳрамонликлари, фронт ортидаги матонатли меҳнати эсга олинди.