Ўзбекистон Республикаси Вазирлар Маҳкамасининг 2022 йил12 апрелда «Ўзбекистон Республикасида жисмоний шахснинг шахсий идентификация рақамини аниқлаш ва бериш тартибини такомиллаштириш тўғрисида»ги қарори қабул қилинди.

Ҳужжат билан жисмоний шахснинг электрон талабномасини шакллантиришни ҳамда қуйидагиларда шахсий идентификация рақамини беришни назарда тутувчи жисмоний шахснинг шахсий идентификация рақамини аниқлаш ва бериш тартиби тўғрисидаги маъмурий регламент тасдиқланди:

- Ўзбекистон ҳудудида туғилган барча шахсларга туғилганликни қайд этиш жараёнида;

- чет давлат фуқароси ёки фуқаролиги бўлмаган шахсга идентификация ID-картаси берилганда;

- чет давлат фуқаросига Ўзбекистон ҳудудида вақтинча бўлиб турганда ёки ўз фаолиятини ишончли вакили орқали амалга ошираётганда;

- фуқаролиги бўлмаган шахсга биометрик ҳаракатланиш ҳужжати расмийлаштирилганда;

- чет давлатда вақтинча ёки доимий яшайдиган Ўзбекистон фуқаролари, уларнинг фарзандлари, чет давлат фуқаролари ва фуқаролиги бўлмаган шахсларга.

Вазирлар Маҳкамаси ҳузуридаги Давлат персоналлаштириш марказига Ташқи ишлар вазирлиги, Ички ишлар вазирлиги ва Адлия вазирлиги билан биргаликда 2022 йил 1 июндан бошлаб Ўзбекистон фуқаролари, Ўзбекистон ҳудудида вақтинча ёки доимий яшаётган чет давлатлар фуқаролари ва фуқаролиги бўлмаган шахслар, хорижий давлатда доимий яшайдиган чет давлат фуқаролари ҳамда фуқаролиги бўлмаган шахсларга, шунингдек, Ўзбекистон Республикаси ҳудудида вақтинча бўлиб турган ёки ўз фаолиятини ишончли вакили орқали амалга ошираётган чет давлат фуқароларига шахсий идентификация рақамларини бериш бўйича давлат хизматлари кўрсатилишини жорий қилиш топширилди.

ЖШШИР фуқароларнинг биометрик паспортида кўрсатилган ва у пастки қаторда жойлашган 14 та рақамдан иборат.

Шунингдек, у ID-картанинг орқа томонида "Шахсий рақам /Personalnumber" ёзуви остида кўрсатилган.

Бугунги кунда Сирдарё вилояти ИИБ МваФРБ ҳамда унинг жойлардаги бўлинмалари томонидан Сирдарё вилояти ҳудудида вақтинча бўлиб турган ёки ўз фаолиятини ишончли вакили орқали амалга ошираётган чет давлат фуқароларига ҳамда фуқаролиги бўлмаган шахсларга шахсий идентификация рақамлари ўрнатилган тартибда расмийлаштириб берилмоқда.

Сирдарё вилояти ИИБ Миграция ва фуқароликни расмийлаштириш бошқармаси