Жорий йилнинг 18 август куни «Ўзбекистон Республикаси Президентининг айрим қарорларига маҳаллаларда жиноятчиликнинг барвақт олдини олиш тизими натижадорлигини янада оширишга қаратилган ўзгартириш ва қўшимчалар киритиш тўғрисида»ги Президент қарори қабул қилинди.

Мазкур қарор мамлакатимизда тинчлик ва осойишталикни таъминлаш, фуқаролар хавфсизлиги ҳамда уларнинг ҳуқуқ ва эркинликларини ишончли ҳимоя қилишга қаратилган ишларининг мантиқий давоми ҳисобланади.

Жиноятчиликка қарши курашишда маҳалла даражасидаги чора-тадбирлар алоҳида аҳамиятга эга. Чунки ҳуқуқбузарликларни айнан биринчи бўғиннинг ўзида бартараф этиш самарадорликка эришишнинг энг тўғри йўли ҳисобланади. Қарорга мувофиқ, охирги беш йил давомида криминоген вазияти мураккаб бўлган «қизил» тоифага киритилган маҳаллаларда жорий йил якунига қадар алоҳида ташкилий-профилактик тадбирлар ўтказилиб, хавфсиз муҳитни яратиш белгиланган.

Шу мақсадда Сирдарё вилояти прокурори ҳамда вилоят ички ишлар бошқармаси бошлиғи Гулистон шаҳар Тараққиёт маҳалласида бўлиб, бу ердаги масъуллар фаолияти билан яқиндан танишдилар.

Жараёнларда маҳалладаги криминоген вазиятга салбий таъсир кўрсатаётган омилларни аниқлаш ва улар билан манзилли ишларни йўлга қўйиш зарурлиги таъкидланди.

Шунингдек, маҳаллада ижтимоий профилактика ишларини кучайтириш, айниқса оила-турмуш доирасида ҳуқуқбузарликка мойил, жанжалкаш ва низоли оилалар ҳолидан мажбурий равишда ҳар уч кунда хабар олиш амалиёти йўлга қўйилиши белгиланди.

Ёшлар бандлигини таъминлаш ва жиноятчиликнинг олдини олиш мақсадида эса «маҳалла еттилиги» ташаббуси билан аҳоли ўртасида тарғибот-ташвиқот ишларини олиб борувчи «маҳалла тарғиботчиси» жамоатчилик гуруҳларини ташкил этиш зарурлиги қайд этилди.

Бундан ташқари, маҳаллада рақамлаштириш жараёнларини тўлиқ амалга ошириш, кузатув камераларининг узлуксиз ишлашини таъминлаш, жисмоний ва юридик шахсларнинг мол-мулкини техник қўриққа олиш қамровини йил якунига қадар янада кенгайтириш бўйича ҳам топшириқлар берилди.

Мазкур ишлар «маҳалла еттилиги» билан доимий ҳамкорликда амалга оширилиши белгиланди.

Сирдарё вилояти ИИБ Ахборот хизмати