Ichki ishlar organlarida “Vatanga va xalqqa sadoqat bilan xizmat qilish oliy burchimiz” shiori ostida oʻtkazilayotgan “Vatanparvarlik oyligi” doirasida joriy yilning 29 avgust kuni Sirdaryo viloyati ichki ishlar organlari xodimlari va ularning oila aʼzolari uchun Sirdaryo viloyati musiqali drama teatrining serqirra ijodkorlari tomonidan inson va qadriyat uygʻunligini oʻz asarlarida hamisha yonma-yon tasvirlab, voqelik ruhiyatini inson qalbi va ongiga noziklik bilan joylab ijod qilgan qardosh qirgʻiz xalqi adibi Chingiz Aytmatovning “Sarviqomat dilbarim...” nomli asari asosida sahnalashtirilgan spektakl namoyish etildi. 

Farzand bu baxtiyor oilaning mevasidir. Asarning bosh qahramonlari “Ilyos” va “Asal” hamda ularning farzandi “Samadbek”ning achchiq taqdirida inson hayoti va mehnat faoliyatida oila, insonparvarlik va farzand quvonchi kabi pok tuygʻularning nechogʻlik ahamiyatli ekanligini koʻrish mumkin. Oʻz navbatida hayotning yorqin tomonlari bilan yonma-yon yuradigan tubanlik, nafs va hirs, xiyonat kabi tuygʻular inson hayot yoʻlini izdan chiqarib, jamiyatda oʻz oʻrni yoʻqolishiga sabab boʻlishi ushbu spektaklning bosh qahramoni “Ilyos”ning timsolida yorqin gavdalangan. Shuningdek, Sirdaryo viloyati IIBda tashkil etilgan “Sanʼatda havaskor isteʼdodlar” jamoasi aʼzolarining hazil-mutoyibaga boy boʻlgan sahna koʻrinishlari va xodimlar tomonidan ijro etilgan kuy-qoʻshiqlar Sirdaryo viloyati musiqali drama teatriga tashrif buyurgan ichki ishlar organlari xodimlari va ularning oila aʼzolarida katta taassurot qoldirdi. Tashkil etilgan bu kabi maʼnaviy va maʼrifiy tadbirlar kelgusida xodimlarni yanada insonparvarlik, vatanga, oilaga muhabbat va sadoqat ruhida xizmat olib borishini taʼminlaydi.

Sirdaryo viloyati IIB Maʼnaviy-maʼrifiy ishlar va kadrlar bilan taʼminlash xizmati.