So‘nggi yillarda mamlakatimizda “Inson qadri uchun” tamoyili asosida nogironligi bo‘lgan shaxslarni qo‘llab-quvvatlash tizimini yana-da takomillashtirish, xususan ko‘zi ojiz va ko‘rishda nuqsoni bo‘lgan bolalarning jamiyatdagi o‘rnini mustahkamlash yuzasidan zarur chora-tadbirlar amalga oshirilmoqda. Mazkur yo‘nalishdagi islohotlarning izchilligi va tizimliligini taʼminlash, ko‘zi ojiz va zaif ko‘ruvchi bolalarning taʼlim olishi uchun yaratilgan shart-sharoitlarni yana-da yaxshilash, ularning jamiyatga moslashuviga ko‘maklashish hamda qo‘llab-quvvatlash borasida ishlarni yangi bosqichga olib chiqish maqsadida bugun, Sirdaryo viloyatida joylashgan "Nurli maskan" maktab-internatida "Nurli maskan orzulari" nomli 5 - Respublika forumi bo‘lib o‘tdi. Bo‘lib o‘tgan forumda ichki ishlar vazirligi Huquqbuzarliklar profilaktikasi xizmati boshlig‘i va Sirdaryo viloyati sektor rahbarlari boshchiligida Respublikada joylashgan barcha Nurli maskan masʼul xodimlari bilan birgalikda maktab-internatida tahsil olayotgan yoshlarga yaratilgan shart-sharoitlar va o‘quvchilarni dars jarayonlari bilan yaqindan tanishib, tajriba almashildi. Masʼullar tomonidan maktab-internatida amalga oshirilgan ishlarni Respublika miqyosida keng tatbiq etish borasida chora - tadbirlar belgilab olindi.

Tadbir so‘ngida Ichki ishlar vazirligi Madaniyat saroyi ashula va raqs ansambli xodimlari tomonidan tayyorlangan konsert dasturi tadbirga ko‘tarinki ruh bag‘ishladi.