Mahallalarda jinoyatchilikni barvaqt oldini olish, kriminogen vaziyatni barqaror holda saqlash, aholi muammolarini doimiy ravishda oʻrganib, ularga samarali yechim topish maqsadida «mahalla yettiliklari» tomonidan tizimli ishlar amalga oshirilib borilmoqda.

Shu maqsadda Sirdaryo viloyati prokurori hamda viloyat Ichki ishlar boshqarmasi boshliqlari Sirdaryo tumanining “Qizil” toifasiga kiritilgan “Bunyodkor” mahallasi yettiliklarining faoliyati bilan yaqindan tanishdi va ularning jinoyatchilikka barham berish, huquqbuzarliklarning barvaqt oldini olish, aholi bandligini taʼminlash hamda mahallani raqamlashtirish borasidagi amalga oshirilgan ishlarini atroflicha muhokama qildi.

Oʻrganishlar davomida mahallalarni jinoyatdan xoli hududga aylantirish maqsadida aholi bandligini taʼminlash, ularning huquqiy madaniyatini oshirish, hududlarni kameralashtirish, oʻquvchi yoshlarni esa taʼtil davrida boʻsh vaqtlarini mazmunli tashkil etish orqali salbiy holatlar yuz berishining oldini olish, mahalla hududida jinoyat va huquqbuzarliklar sodir etilishiga yoʻl qoʻymaslik, yoʻl harakati xavfsizligini taʼminlash borasida ishlab chiqilgan yoʻl xaritasi boʻyicha amalga oshirilayotgan ishlar koʻzdan kechirildi.

Shuningdek, jamoat tartibini mustahkamlash, fuqarolarning xavfsizligini taʼminlash va yoʻl harakati qoidalariga rioya etilishi masalalariga alohida urgʻu berildi. Masʼullar ushbu yoʻnalishlarda olib borilayotgan chora-tadbirlarni yanada kuchaytirish zarurligini taʼkidladi.

Shu bilan birga Prezidentimizning 2025-yil 3-yanvardagi PQ-1 sonli qarori ijrosi, ijtimoiy profilaktika hamda mahalla yettiligi hamkorligida amalga oshirilayotgan ishlar ham oʻrganilib, bu borada yoʻl qoʻyilgan kamchiliklarni bartaraf etish yuzasidan tegishli tavsiya va koʻrsatmalar berildi.

Uchrashuv yakunida, tuman masʼullariga mahallalarda fuqarolar xavfsiz yashashlari uchun barcha chora-tadbirlarni amalga oshirish lozimligi aytilib, mahalla hududini xavfsiz maskanga aylantirish boʻyicha masʼullarga tegishli topshiriq va koʻrsatmalar berdi.

Sirdaryo viloyati IIB Axborot xizmati