Yoshlar oʻrtasida vatanparvarlik tuygʻularini shakllantirish, ularni ona Vatanga sadoqat ruhida tarbiyalash maqsadida joriy yilning 31 mart kuni Guliston shahar Xalq taʼlimi boʻlimi tasarrufidagi 7-sonli IDUM oʻquvchilarining Sirdaryo viloyati Ichki ishlar boshqarmasida tashkil etilgan “Ajdodlar izidan avlodlar”muzeyiga tashrifi uyushtirildi. Ushbu tashrifda oʻquvchilar Sirdaryo viloyati Ichki ishlar boshqarmasining “Ajdodlar izidan avlodlar” muzeyini koʻzdan kechirar ekan, Sirdaryo viloyatining boy tarixi, Sardoba suv omborining talafoti, shahar-tuman Ichki ishlar organlarining tarixi, ikkinchi jahon urushi va Afgʻoniston urushi qatnashchilari, xizmat faoliyatida yuqori natijalarga erishib kelgan hamda Prezident tomonidan davlat mukofotiga sazovor boʻlgan xodimlar, xizmat vazifasini bajarish chogʻida mardlarcha halok boʻlgan xodimlarning faoliyatini koʻrib oʻz hayratlarini yashira olmadilar. Shuningdek, Ichki ishlar vazirligining bayrogʻi va emblemasi, shahar-tuman ichki ishlar organining tashkil etilishi tarixi, uni tasvirlovchi fotosuratlar, faoliyatiga oid lavhalar va alohida namunali belgilar, davlat mukofotlari va idoraviy koʻkrak nishonlari tasvirlari aks ettirilgan stendlar, jamoa va alohida xodimlar tomonidan sportda erishilgan yutuqlar, Amir Temurning “Temur tuzuklari” asari haqidagi maʼlumotlar, unda bayon etilgan davlat xizmati va xavfsizlikni taʼminlashga oid lavhalar, oʻzbek xalqining buyuk siymolari, mutafakkir olimlari va allomalarining hayoti va faoliyatiga oid stendlar va oʻsha davrlar ruhini toʻliq his etishga imkon beruvchi eksponatlar, Oʻzbekiston Respublikasi Prezidentining ichki ishlar organlariga tashriflari va faoliyatiga oid iqtiboslari aks ettirilgan stendlar ushbu vatanparvarlik burchagi hamda muzeyga tashrif buyurgan yoshlarda katta taʼsurot qoldirdi. Tashkil etilgan bu kabi tadbirlar yoshlarning vataniga, xalqiga va oilasiga boʻlgan sadoqatini yanada mustahkamlashga xizmat qiladi.

Sirdaryo viloyati IIB Maʼnaviy-maʼrifiy ishlar va kadrlar bilan taʼminlash xizmati.